Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialında Xalq şairi Məmməd Arazın 90 illik yubileyinə həsr edilmiş tədbir keçirilib.
Bu barədə muzeydən məlumat verilib.
Muzeyin Aran regional filialının müdiri filologiya üzrə fəlsəfə doktoru Yaqut Bahadurqızı şairin çoxcəhətli və zəngin ədəbi irsindən danışıb, onun ədəbiyyatımızın inkişafındakı xidmətlərini qeyd edib. O bildirib ki, Məmməd Arazın irsi zəngin və səmimi olduğundan hər kəsin dilinə yatır, ürəyinə yol tapır. Şair kağıza həkk etdiyi hər misrasında Vətən sevgisini, dərin həyat fəlsəfəsini milyonlarla oxucuya ötürən görkəmli söz ustadı olub.
Filial müdiri qeyd edib ki, ömrünün enişli-yoxuşlu illərində sınmayan, əyilməyən şairi fiziki cəhətdən sındırsalar da, onun ruhunu, məsləyini sındıra, əyə bilmədilər: “Sovetlərin ən qatı, ən sərt zamanında Vətən məfkurəsi, cənublu, şimallı Azərbaycan arzusu ilə yaşayan və bunu açıq-aşkar yaradıcılığında qorxmadan əks etdirən şair Məmməd İbrahimov Arazı özünə təxəllüs götürərək: “Azərbaycan deyiləndə ayağa dur ki, ana yurdun ürəyinə toxuna bilər”, – deyib. Hər misrası, hər bəndi kiçikdən böyüyə hər kəsin sevimlisinə çevrilən Məmməd Araz xalqın şairi olmağı, milli ruhu daşımağı mükəmməl şəkildə bacarıb”.
Daha sonra Kürdəmir şəhər 4 nömrəli məktəbin dil-ədəbiyyat müəllimi Aytən Umudova çıxış edərək Məmməd Arazın mənalı, keşməkeşli və şərəfli, bütövlükdə Vətənə və sənətə həsr olunmuş əsl şair-vətəndaş ömrü yaşadığını söyləyib.
Tədbirdə, həmçinin Kürdəmir Rayon İcra Hakimiyyəti başçısının müavini Vəsilə Əsgərli, yazıçı-publisist Əlisəfa Azayev, Mərkəzi Aran Regional Mədəniyyət İdarəsinin Kürdəmir rayon üzrə nümayəndəsi Vaqif Alıyev, kitabxanaçı, şəhid anası Müşkünaz Əliyeva, Məmməd Araz pərəstişkarı, Kürdəmir rayon Mollakənd tam orta məktəbinin direktoru Akif İbrahimov çıxış edərək zamanla hesablaşmayan Məmməd Araz şeirlərinin poetik təfəkkürümüzün ən uğurlu ifadəsi olmasından, onun milli azadlıq ideyalı əsərlərilə istiqlal şairi olaraq əbədi şöhrət qazanmasından bəhs ediblər.
Məktəblilər şairin dillər əzbəri olan şeirlərindən nümunələr səsləndiriblər.
Mərasimdə, eyni zamanda, görkəmli şairin həyat və yaradıcılığının müxtəlif məqamlarını əks etdirən videoçarx nümayiş etdirilib, sözlərinə bəstələnmiş musiqi nümunələri səsləndirilib.
Sonda Məmməd Arazın şeirlərini daha gözəl söyləyən şagirdlərə N.Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun imzaladığı fəxri fərman təqdim edilib.
