Mektebgushesi.az  “Azərbaycan müəllimi”nə istinadən  xəbər verir ki, tədbir davamlı gələcək üçün müsbət fəaliyyətləri təşviq etmək üçün müxtəlif sektorlardan dünyanın 5000-dən çox aparıcı təhsil liderləri, novator və siyasətçiləri bir araya gətirəcək.

Ali təhsil sahəsində nüfuzlu beynəlxalq tədbirin spikerləri Azərbaycanın elm və təhsil naziri Emin Əmrullayev, Türkiyənin Ali Təhsil Şurasının sədri Erol Özvar, “Times Higher Education”nun qlobal məsələlər üzrə Baş direktoru Fil Bati, Ümumdünya Səhiyyə Təşkilatının Ətraf mühit, iqlim dəyişikliyi və sağlamlıq departamentinin direktoru Mariya Neyra, UNESCO-nun Təhsilin davamlılığa doğru yönləndirilməsi departamentinin həmsədri, York Universitetinin professoru Çarlz Hopkins, Böyük Britaniyanın Lankaster Universitetinin Ətraf Mühit Mərkəzinin professoru Mayk Berners-Li, Elm və Ali Təhsil üzrə Dövlət Agentliyinin direktoru Ülkər Səttarova, Honkonq Politexnik Universitetinin struktur mühəndisliyi departamentinin direktoru professor Jin-Quang Teng, COP29-un Azərbaycan üzrə “Gənclər İqlim Çempionu” Leyla Həsənova, Türkiyənin İnkişaf və İnvestisiya Bankının icraçı vitse-prezidenti Sesil Yıldız, Honkonq Dövlət Universitetinin prezidenti Freddy Boey və b. qlobal dayanıqlı inkişaf məsələləri və bu prosesdə təhsilin rolu barədə çıxış edəcəklər.

Dörd gün ərzində 400-dən çox məruzəçi, o cümlədən ali təhsil liderləri, davamlılıq sahəsində dəyişiklik yaradanlar və biznes rəhbərləri texnologiya, təhsil, sənaye, səhiyyə, şəhərlər, ətraf mühit və xüsusən davamlı inkişafı haqqında öz fikirlərini bölüşəcəklər.

Tədbirdə dünya universitetərinin 2025-ci il üzrə “THE Impact Rankings 2025” reytinqi açıqlanacaq. Qeyd edək ki, 2019-cu ildə istifadəyə verildiyi vaxtdan bu reytinqə bir milyondan çox məlumat təqdim edən 2152 qurum daxil edilib.

Konqresdə “Gələcəyə hazır siniflər: məqsədyönlü STEM təlimi davamlı dəyişikliklərə necə kömək edir”, “Ali təhsildə davamlı inkişaf sahəsində səriştə potensialının açıqlanması” , “SDG-nin ali təhsilə inteqrasiyası: akademik dairələrin, sənayenin və QHT-lərin birləşməsi”, “Yaşıl gələcək yarışında süni intellektin rolu”, “Ali təhsil müəssisələrinin daha innovativ və davamlı məktəblərə çevrilməsi” və s. mövzular diqqətdə olacaq.

Honkonq Politexnik Universitetinin biliklərin ötürülməsi və sahibkarlıq üzrə direktoru Kelvin Vonq çıxışında universitetlərin bilik və sahibkarlığın səmərəli ötürülməsində rolu məsələsinə toxunacaq. Universitetlər elmi nailiyyətlərin və ixtiraların laboratoriyalardan biliklərə ötürülməsi, onların ictimai təsirinin artırılması vasitəsilə real tətbiqlərə köçürülməsində getdikcə daha çox rol oynayır. K.Vonq çıxışında Honkonq Politexnik Universitetinin dinamik bilik və sahibkarlıq ekosisteminin yaradılmasına necə töhfə verdiyindən danışacaq.

“THE təsir reytinqi (The Impact Rankings) üçün qələbə strategiyaları: mövqeyinizi yaxşılaşdırmaq üçün ekspert təlimatı” adlı interaktiv panel sessiya THE təsir reytinqində iştirak edən, məlumat strategiyalarını təkmilləşdirmək və reytinqlərdə göstəricilərini artırmaq istəyən universitetlər üçün nəzərdə tutulub. THE-nin məlumatları üzrə ekspert qrupunun rəhbərliyi altında və təcrübəli qurumların ideyalarından istifadə etməklə bu sessiya məlumatların toplanması, DİM-lərin seçilməsi və ən yaxşı müraciət təcrübələri üzrə praktiki tövsiyələr verəcək.

“Gələcəyin işçi qüvvəsinin yaradılması: süni intellekt və rəqəmsal texnologiyalar sahəsində istedadların inkişafı” adlı sessiya ali təhsil müəssisələrinin süni intellekt və texnologiya sahəsində yeni nəsil mütəxəssislərin hazırlanmasında oynadığı əsas rola həsr olunacaq.

Maraq doğuracaq sessiyalardan biri “SDG-nin ali təhsilə inteqrasiyası: akademik dairələrin, sənayenin və QHT-lərin birləşməsi” mövzusuna həsr olunacaq. Burada natiqlər davamlı inkişaf məqsədlərinə uyğun təhsil modellərinin təşviqi məqsədilə akademik dairələr, sənaye və QHT arasında konkret əməkdaşlıq məsələlərini müzakirə edəcəklər.