Bu gün onların da Uşaqların Beynəlxalq Müdafiəsi Günüdür.

Bu uşaqlar bilirlər ki, adlarını qürurla çəkdikləri ataları təkcə onları yox, bütün Azərbaycanı, yalnız  bu günümüzü deyil, həm də sabahımızı müdafiə ediblər.

Mektebgushesi.az xəbər verir ki, “Azərbaycan müəllimi” qəzeti  Şuşa şəhərində keçirilən “Şuşa – türk xalqları birliyinin mədəniyyət incisidir” adlı beynəlxalq uşaq yaradıcılıq festivalını izləmək üçün gəlmiş şəhid övladlarını elə orada daha yaxından tanımaq üçün həmsöhbət olub.

Festival çərçivəsində təşkil olunan konsert proqramında iştirak etmək üçün türk dövlətlərindən 300 nümayəndə, tanınmış mədəniyyət və incəsənət xadimləri, həmçinin tamaşaçı qismində iştirak edən 150-yə yaxın məktəbli və şəhid övladı Şuşaya gəlib.

İlk müsahibimiz ilə İsa bulağında tanış olduq. Quba şəhəri 1 nömrəli tam orta məktəbin 8-ci sinif şagirdi, şəhid kapitan Aqil Məlikovun qızı Xədicə Məlikli Şuşada sözlərlə anladılması mümkün olmayan duyğular yaşadığını qeyd edir:

“30 ildən sonra azad olunmuş bu torpaqlarda nəfəs almaq, gəzmək, gülmək çox böyük qürur və həyəcan yaradır. Bu zəfəri ölkə başçısı cənab İlham Əliyevin qətiyyəti, onun “dəmir yumruğu”, ordumuzun şücaəti və xalqımızın cəsarətinə görə qazanmışıq”.

Xədicə İsa bulağının suyundan içib, Şuşanın havasını içinə çəkən hər bir azərbaycanlının yaşaya biləcəyi hisslərdən qürurla danışırdı. Bu yeniyetmə qız əmindir ki, atası onun bu torpaqlarda böyük fəxrlə  gəzdiyini hiss edir:

“Bilirəm ki, atam məni görür. Onun izi olan bu yerlərdə olmaq mənim üçün əvəzolunmaz duyğular deməkdir. Atamla qürur duyuram”.

İsa bulağından ayrılandan sonra Cıdır düzündə Yusif ilə həmsöhbət olduq. Lənkəran şəhəri 7 nömrəli tam orta məktəbin 7-ci sinif şagirdi, şəhid Taleh İsmayılovun oğlu Yusif İsmayılov deyir ki, övladlarını Cıdır düzünə gətirmək atasının arzusu idi:

“Atam müharibəyə gedərkən demişdi ki, sağ qayıtsam, birlikdə Şuşaya gedəcəyik. Bizə bir bayraq vermişdi və söyləmişdi ki, o bayrağı Şuşada dalğalandıracağıq. Amma ona qismət olmadı… Böyük qardaşımla birlikdə o bayrağı buraya gətirib dalğalandırdıq”, – dedi səsi titrəyən, gözləri isə sanki Cıdır düzünün əzəmətli mənzərəsinə zillənən Yusif.

O, gələcəkdə hərbçi olaraq atasının yolunu davam etdirmək istəyir.

Şuşanın simvoluna çevrilmiş qala qapısının qarşısında isə Bakı şəhəri XXI Əsr Beynəlxalq Təhsil və İnnovasiya Mərkəzinin şagirdi Melisa Xəlilova ilə tanış olduq:

“Buraya gələrkən çox sevinirəm. Şəhidlərimizin sayəsində bu torpaqlardayıq. Onların qəhrəmanlığı sayəsində bu gözəl yerləri görə bilirik. Bu həm qürurvericidir, həm də duyğulandırır”, – deyə Melisa əlavə edib.

Şuşada həmsöhbət olduğumuz bu məktəblilər ölkəmizin müxtəlif regionlarından “Zəfər” Şəhid Ailələrinə Dəstək İctimai Birliyinin təşəbbüsü ilə festivalı izləmək üçün gəliblər. Birliyin rəhbəri, şəhid polkovnik-leytenant Raquf Orucovun həyat yoldaşı Sevinc Orucova qeyd edib ki, bugünkü festivalda Azərbaycanın müxtəlif bölgələrindən – Quba, Lənkəran, Beyləqan, Masallı, Sumqayıt və s. 20-yə yaxın şəhid övladı iştirak edir:

“Biz hər il bu festivala yeni iştirakçıları – müxtəlif regionlardan olan uşaqları dəvət etməyə çalışırıq. İnanırıq ki, bu cür tədbirlər onların həm emosional, həm də sosial inkişafına müsbət təsir edir və gələcəkdə özlərini cəmiyyətə daha inamlı şəkildə təqdim etmələrinə dəstək olur”.

Bu gün Şuşada atalarının əmanətinə sahib çıxan bu uşaqlar bizə bir daha göstərdilər ki, şəhidlik zirvəsi yalnız keçmişin qəhrəmanlıq salnaməsi deyil, həm də gələcəyin ilham mənbəyidir. Onlar təkcə yadigarlıq daşıyıcısı deyil, həm də bu torpaqlarda sülhün, qürurun və davamlılığın simvoluna çevriliblər. Şuşada onların baxışında gördüyümüz qətiyyət isə bizə bir həqiqəti xatırlatdı: Vətən yalnız canla deyil, ruhla da qorunur.

Gününüz mübarək, azad yurdun övladları!