Dövlət ümumi təhsil müəssisələrinə müəllimlərin işə qəbulu üzrə keçiriləcək test imtahanı mərhələsində “Xarici dil” (Fransız dili) ixtisası üzrə iştirak edəcək namizədlərə ümumilikdə 40 sual təqdim ediləcək.
Bu barədə Mektebgushesi.az Təhsil İnstitutunun təqdim etdiyi “Müəllimlərin işə qəbulu müsabiqəsinin qiymətləndirmə çərçivəsi” sənədinə əsasən xəbər verir.
Bildirilir ki, namizədlər oxuyub-anlama üzrə 15, leksikologiyadan 8, dil qaydaları üzrə isə 17 suala cavab verməlidirlər.
Məzmun sahələri üzrə mövzular:
1. Oxuyub-anlama
Cümlə, dialoq və ya mətn qurmaq
Cümləni, dialoqu və ya mətni məntiqi sonluqla tamamlamaq
Cümləni parafraz etmək
Mətnin əsas fikrini, ideyasını tapmaq
Mətn əsasında ən uyğun nəticəni seçmək, səbəb-nəticə əlaqəsini müəyyən etmək
Mətni sürətli gözdən keçirib, spesifik məlumatı tapmaq
Mətndə müəyyən bir fikrin verilib-verilməməsini təyin etmək və ya mətnə aid olmayan fikirləri tapmaq
Mətnin məzmununa uyğun düzgün başlığı seçə bilmək, yaxud başlığa uyğun düzgün mətn seçmək
2. Leksikologiya
Sinonimləri, antonimləri, frazeoloji ifadələri, idiomları və atalar sözlərini mənasına uyğun olaraq düzgün müəyyən etmək və ya cümlədə istifadə etmək
Verilmiş vəziyyət üçün düzgün sözü və ya ifadəni istifadə etmək
Kontekstdən sözü anlamaq və mənasını müəyyən etmək
Sözləri mənalarına görə fərqləndirmək və ya uyğunlaşdırmaq
3. Dil qaydaları
3.1. Morfologiya
Artikllar: hissəvi artikl, ölkələrin adları qarşısında artikl, nəqliyyat vasitələri qarşısında artikl və s.
İnkar forması. Sözönü
İsim: isimlərin quruluşca növləri, ismin kişi və qadın cinsi, isimlərin cəmlənməsi, ismin uzlaşması
Sifət: sadə və mürəkkəb, qeyri-müəyyən sifətlər, sinonim, omonim, antonim sifətlər, sifətin dərəcələri, sifətin digər nitq hissələri ilə uzlaşması
Say: miqdar sayını sıra saylarından fərqləndirmək
Əvəzlik: əvəzliyin cinsə və kəmiyyətə görə dəyişməsi, vasitəli və vasitəsiz əvəzlik (COD, COI)
Zərf: zərflərin quruluşca növləri, mənaca növləri, zərfin dərəcələri, sual zərfləri, cérondif
Feil: felin qeyri-müəyyən forması (məsdər), köməkçi və yarım-köməkçi feillər;
İndiki zaman
Keçmiş zamanlar – Passé Composé, Imparfait, Subjonctif, Plus-que-parfait
Gələcək zamanlar – Future Proche, Future Simple, Future dans le Passé və s. formalar
Feil qrupları, felin quruluşca növləri, təsirli və təsirsiz fellər, qayıdış feilləri, feilin əmr forması
3.2. Sintaksis
Məntiqi vurğu. Cümlə. Sadə və mürəkkəb cümlə
Cümlənin əsas və ikinci dərəcəli üzvləri
Sual, ümumi və xüsusi suallar
İnkar, qəti-inkar ifadələri
Sənəddə qeyd olunur ki, test mərhələsində bütün fənlər üzrə, o cümlədən metodika və pedaqogika sahəsində namizədlərin bilik və bacarıqları həm nəzəri, həm də praktik baxımdan yoxlanılır.
Tədris dilləri (Azərbaycan və rus), xarici dillər (ingilis, fransız, rus, alman) və Azərbaycan dili (dövlət dili) fənləri üzrə oxuyub-anlama bacarığının qarşısında qeyd edilən say mətnlərin miqdarını deyil, sualların miqdarını əks etdirir.
Əlavə olaraq vurğulanır ki, mövzular müəyyən edilərkən ümumi təhsil müəssisələrində istifadə olunan dərsliklərə istinad edilib və təqdim olunan mövzulara xüsusi diqqət yetirilməsi tövsiyə olunur.
Xatırladaq ki, müəllimlərin işə qəbulu üzrə qeydiyyat 29 may saat 11:00-dək davam edəcək. Müsabiqədə iştirak etmək istəyən namizədlər əvvəlcə “Digital Login” əldə etməli və www.miq.edu.az saytına daxil olaraq onlayn qeydiyyatdan keçməlidirlər
