Türkiyənin Ailə və Sosial Xidmətlər naziri Mahinur Özdemir Göktaş Azərbaycana səfəri çərçivəsində Xəzər Universitetinin professor-müəllim heyəti və tələbələrlə görüşüb. Tədbir Xəzər Universitetinin Tarix və arxeologiya departamentinin təşkilatçılığı ilə keçirilib.

Görüşdə Türkiyənin ölkəmizdəki səfiri professor Birol Akgün də iştirak edib.

Bu barədə Mektebgushesi.az -a univesitetdən məlumat verilib.

Tədbir Azərbaycanın və Türkiyənin Dövlət himnlərinin ifası ilə başlanıb.

Tədbirin bədii hissəsində Xəzər Universiteti Kamera orkestrınin müşayiəti ilə bir sıra musiqi parçaları səsləndirilib, “Çırpınırdı Qara dəniz” əsəri ifa olunub. Musiqili proqramla yanaşı, rəqs nömrələri də təqdim edilib.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı Türkiyə – Azərbaycan arasında dostluq və qardaşlıq münasibətlərini daim inkişaf etdirməyin əhəmiyyətindən danışıb.

Tədbirin moderatoru,Tarix və arxeologiya departamentinin müdiri dosent Telman Nüsrətoğlu ümumi türk tarix və mədəniyyətinin ailə dəyərlərinə verdiyi önəmi vurğulayıb.

Nazir Mahinur Özdemir Göktaş çıxışında gənclərə motivasiya verən fikirlər səsləndirib, öz karyera yolundan, Avropada islamofob bir mühitdə mlli kimliyini qoruyaraq apardığı siyasi mübaruzədən, qarşılaşdığı çətinliklərdən və bu yolda ailəsinin ona göstərdiyi dəstəkdən bəhs edib.