Bakıda Alman Akademik Mübadilə Xidməti (DAAD, Bonn) DAAD Bakı Məlumat Mərkəzi ilə birgə “Bolonya əməkdaşlıq forumu” keçirir.

AZƏRTAC xəbər verir ki, müvafiq qurumların nümayəndələrinin, mütəxəssislərin iştirak etdikləri tədbirdə Alman Akademik Mübadilə Xidmətinin siyasi dəstək şöbəsinin icraçı direktoru David Flores müasir dünyada təhsilin, xüsusilə ali təhsilin mühüm rolundan danışıb.

İcraçı direktor forumun əhəmiyyətini vurğulayıb. Qeyd olunub ki, tədbirin ümumi hədəfi Azərbaycan və Avropa Ali Təhsil Məkanına – Bolonya prosesinə qoşulan digər ölkələrin ali məktəbləri arasındakı əməkdaşlığı dəstəkləməkdən ibarətdir. Forum Bolonya təhsil sisteminin bütün sahələrini əhatə edir.

Almaniyanın ölkəmizdəki səfiri Volfqanq Maniq Azərbaycan-Almaniya əlaqələrindən bəhs edib. Bildirilib ki, bu əlaqələr təhsil sahəsində də uğurla davam etdirilir.

Təhsil Nazirliyinin aparat rəhbərinin müavini Yaqub Piriyev ölkəmizdə təhsilə xüsusi önəm verildiyini deyib, bu sahənin inkişafı ilə bağlı həyata keçirilən tədbirlərdən və proqramlardan danışıb. Qeyd olunub ki, Azərbaycan Avropa Ali Təhsil Məkanına – Bolonya prosesinə 2005-ci ildə qoşulub. Həmin dövrdən Azərbaycanda ali təhsilin keyfiyyətinin yüksəldilməsi, ali təhsilə əlçatanlığın genişləndirilməsi istiqamətlərində əsaslı islahatlar aparılır. Yaqub Piriyev ali təhsil sahəsində əldə olunan uğurları da diqqətə çatdırıb.

Sonra ali təhsil sahəsi, universitetlər arasında əməkdaşlığın genişləndirilməsi ilə bağlı müzakirələr aparılıb.