Azərbaycan İlahiyyat İnstitutu tələbələrin dünyagörüşünün artırılması və maarifləndirilməsi üçün “Bədii əsər oxuma müsabiqəsi” layihəsinə start verib. Layihədə yerli və xarici ədəbiyyatın görkəmli nümayəndələrinin seçmə əsərlərinin oxunması nəzərdə tutulur.
İnstitutdan Mektebgushesi.az-a bildirilib ki, müsabiqədə iştirak etmək istəyən tələbələr noyabrın 30-dək qeydiyyatdan keçməlidirlər.
Layihə çərçivəsində “Bədii əsər oxuma (yerli ədəbiyyat)” və “Bədii əsər oxuma (xarici ədəbiyyat)” müsabiqələri keçiriləcək. “Bədii əsər oxuma (yerli ədəbiyyat) – I” müsabiqəsi dekabrın 21-də olacaq. Layihədə İsa Hüseynovun “Məhşər”, Süleyman Rəhimovun “Mehman”, Məmməd Səid Ordubadinin “Qılınc və qələm”, Cəfər Cabbarlının “Almaz”, Hüseyn Cavidin “İblis” əsərlərinin oxunması nəzərdə tutulur. Müsabiqənin sonunda qaliblər mükafatlandırılacaq.