Nəhayət 10 illik bir müddət ərzində gözlənilən addım atıldı. Prezident İlham Əliyevin dövlət məktəbəqədər təhsil sistemində idarəetmənin təkmilləşdirilməsi haqqında imzaladığı Sərəncama əsasən yerli icra hakimiyyəti orqanlarının (Bakı şəhəri üzrə Bakı Şəhər İcra Hakimiyyətinin, Gəncə şəhəri üzrə Gəncə Şəhər İcra Hakimiyyətinin) tabeliyində olan dövlət məktəbəqədər təhsil müəssisələri (uşaq evləri istisna olmaqla) Azərbaycan Respublikası Təhsil Nazirliyinin tabeliyinə verilir. Əsasnaməyə edilən dəyişikliklə “məktəbəqədər təhsil müəssisələri” sözləri “uşaq evləri” sözləri ilə əvəz edilib.

Ölkə başçısının bu addımı təhsilə vahid mexanizm kimi baxmasının, Təhsil Nazirliyini təhsildə dövlət syasətinin həyata keçirilməsində ali icraedici orqan kimi qiymətləndirməsinin, uşaq bağçalarına rəhbərlik və nəzarət edilməsində Nazirliyə bir daha əlavə şans verməsinin, ekspertlərin fikirlərinə, ümumi ictimai rəyə diqqətlə yanaşmasının bariz nümunəsi olub, təhsilin vahid mərkəzdən idarə edilməsini daha çevik və mobil mexanizminin yaradılmasına olan bir töhfəsidir.

Nəzərə alsaq ki, bağçalar 2011-ci ildən Təhsil Nazirliyindən alınaraq icra hakimiyyətlərinin tabeliyinə verilmişdi, bu da bu sahədə olan boşluqlar və digər məlum səbəblərlə əlaqədar idi. Digər bir məsələ bağçalara təşkilati və təzcihat baxımından icra hakimiyyətinin dəstəyi lazım idi.

Maraqlıdır 10 il ərzində bağçaların icra hakimiyyətlərinin tərkibində olması nəyi dəyişdi?

Artıq vəziyyət dəyişib, yeni vəzifələr və konkret hədəflər müəyyənləşdirilib. Özəlləşdirmə sahəsində yol verilən nöqsanların aradan qaldırılması istiqamətində addımlar atılıb. “Azərbaycan Respublikasında təhsilin inkişafı üzrə Dövlət Strategiyası”nda erkən yaşlı uşaqların məktəbəqədər təhsillə əhatəsinin 90 faiz səviyyəsinə çatdırılması, məktəbə hazırlıq təhsilinin (1 il) icbariliyinin təmin olunması vəzifəsi irəli sürülərkən yeni məktəbəqədər müəssisələrin tikilməsinə baxmayaraq məktəbəqədər təhsilə cəlb olunma səviyyəsinin hələ də aşağı olması, məktəbəqədər təhsillə əhatə səviyyəsi şəhərlərdə 23,4, kəndlərdə 8,7, ölkə üzrə isə 16,5 faiz təşkil etməsi, təhsilin idarə olunmasında başlıca problemlərdən biri təhsildə tənzimləmə, idarəetmə və nəzarət funksiyalarının dəqiq müəyyən edilməməsi, təhsil sistemini idarə edən orqanların səlahiyyətlərinin, funksiyalarının və məsuliyyətinin dəqiq müəyyənləşməməsi göstərilib.

Təhsil haqqında Qanunda da məktəbəqədər təhsilə təhsil pillələrinin tərkib hissəsi kimi baxılır və məktəbəqədər təhsil bütövlükdə təhsilin ilk pilləsi kimi xarakterizə olunur. Təhsil sahəsində dövlət siyasətinin keyfiyyətlilik, səmərəlilik, fasiləsizlik, vəhdətlik, daimilik, varislik, inteqrasiya kimi əsas prinsipləri də təhsilin bir mexanizm olaraq vahid sistem halında bir mərkəzdən idarə olunmasını zəruri edir. Onu da nəzərə alsaq ki,  icra hakimiyyəti  orqanları tabeliyində olduğu müddətda məktəbəqədər təhsil müəssisələrinin fəaliyyətinə rəhbərlik və nəzarət istiqamətində qida təminatından başqa hansısa bir əsaslı dönüş yarada bilməyib, bu hal uşaq bağçalarına nəzarətin yenidən Təhsil Nazirlyinə qaytarılması məsələsini qaçılmaz edib. Məktəbəqədər hazırlıq qruplarınn müəyyən qisminin məhz məktəblərdə fəaliyyət göstərməsi də bu məsələnin həll edilməsin gündəmə gətirən zəruri şərtlərdən biridinə çevrilib.

Dövlət məktəbəqədər təhsil sistemində idarəetmənin təkmilləşdirilməsi haqqında Azərbaycan Respublikası Prezidentinin 20 dekabr 2021-ci il tarixli Sərəncamı bu baxımdan alqışa və təqdirəlayiqdir.