Saytımızla əməkdaşlıq edən Humay Nəhmətli 246 nömrəli lisey-məktəbin IX sinif şagirdi Məmmədzadə Banu İlqarın qonağı oldu.
– Banu kimdir? Bu adı sənə kim verib?
– Nənəm, əslində, Banu Çiçək qoymaq istəsə də, bəxtimdən Banu olub. Çiçək sevən deyiləm, amma adımı çox xoşlayıram. Adımın mənası “qadın” deməkdir.
– Adın sənin üçün nə ifadə edir?
-Ümumiyyətlə, adlar mənim üçün çox önəmlidir. Yeni tanış olduğum birinin ilk öncə adının mənasına baxıram. Və demək olar ki, ən sevdiyim şey adımdır.
– Özün haqqında qısaca məlumat verə blərsən?
– Özüm haqqımda qısa danışa bilmərəm, çünki kim olduğumu tam ifadə edə bilməyəcəyimi düşünürəm. Amma bəzi şeylər deyə bilərəm. Məsələn, ən sevdiyim rəng ağdır. Kitab oxuağı sevirəm. Məncə, sevdiyimiz şeylər xarakterimiz üçün önəmlidr. Kitab oxumağı sevirəm.
– Ən sevdiyin yazıçı kimdir?
– Əslində yazıçıya yox, kitaba baxıram. Yəni kitabdan kitaba dəyişir. Amma Dostoyevski və Nitşeni oxumağı sevirəm. Şairlərdən isə Ramiz Rövşən və Aqşin Yeniseyin əsərlərini sevirəm.
– Ən sevdiyin əsər var?
– Dostoyevsknin “Karamazov qardaşları” əsərini çox sevirəm.
– Nə vaxtdan bəri yazırsan? İlk şeirini xatırlayırsanmı?
– Dəqiq vaxt deyə bilmirəm. Anamın dediyinə görə, uşaqlıqdan bəri yazmağa meyilli olmuşam. İlk şeirimin nə olduğunu deyə bilmərəm. Uzun müddətdir ki, yazıram.
– Şeirlərini yazarkən nə düşünürsən?
– Mən duyğularımı çox yüksək yaşayıram. Şeirlərimdə də bunun təsiri var. Şeir yazarkən hisslərimi ifadə etməyə çalşıram sadəcə.
– Bir şeirində “Mürəkkəb deylik, tapılmayaq deyə çətinləşirik” demisən. Sən tapılmaq istəyirsən?
– Mən tapılmaq istəyirəm, tapılacağımı da blirəm. Karamazov qardaşlarında belə bir söz var: “Tanrının elə vergiləri var ki, hər kəsə yox, sadəcə seçilmişlərə qismət olur”. Yazıçıların da onlardan olduğunu düşünürəm.
– Bir şeirində isə “Yazmaq, həqiqətən, uzaqlaşdırır, yazarkən sus deməlisən yanındakılara, toxuna biləsən uzaqdakilara” demisən. Nə demək istəmisən bu misralarda? Yaxındakiları susdurmaq ehtiyacı niyə hiss etmisən?
– Çünki əgər xüsusi birisənsə, xüsusi insanlarda daha çox cəmiyyətə fayda ermək istəyi, fərqindəlik olur. Bir yandan xeyirxahlıq, mərhəmət hiss etsən də, bir yandan da nifrət hissi yaranır. Fərqində olmasalar belə, yanındakılardan uzaqlaşırlar. Yəni dünya həssas insanlar üçün cəhənnəmdir.
– Sənin üçün özəl bir şeirin var mı?
– Bir şeirimlə mən televiziyaya çıxmışdım. İlk bu şeirimlə tanınındığım üçün mənim üçün özəldir.
– Gələcək planların nələrdir?
– İxtisasımı dəqiq bilmirəm, amma yazmağa davam edəcəm.
Müsahibəni apardı: XI sinif şagirdi Humay Nəhmətli
Sən fərqlisən?
Həyatımdakı bütün obraz və əlavələrə…
Banu ilqar qızı
… ən çox payızı sevirəm
küləyin əsməyini
yalanları ortaya çıxmış insanlar kimi
ağacların çırıl – çılpaq qalmasını
ən çox payızı sevirəm
yağışın yağmağını
insanlara göy üzünün də
ağlaya biləcəyini xatırlatmasını…
Hər kəsi
eşitməyə çalışdım
səsləri
bir-birinə qarışdı
susdun
susdun
danışdın
mən də başa düşmədim
tanrıya özənmişdim
hər şeyi
sevməyə öyrəşdim
sonra da sevgim qurtardı
mən tanrı deyiləm axı
Sonra tanımadığın bir adamın
şerinə rast gələrsən
ağlamaq istəyərsən
qazana bilməyəcəyin
bir – iki şey itirmisən
Həqiqət pis yerlərdədi
xəstəxana otağının qapısından çıxan
bir həkimin ağzındadır
bacısını qardaşını
sinif yoldaşını xəbərləyən
bir uşağın qəddarlığındadır
adətən aparıcıların yox
yazıçıların dilindədir
amma gözəl yerlərdə
olmur ki həqiqət…
Bir səfərlik qorxmazsan
Bir addım atarsan
Kiminsə həyatını dəyişərsən
Eşqini etiraf edərsən
Ya da haqsızlığa göz yummazsan
Bir addım atarsan
Yəni susmazsan
Və görərsən ki qorxmaz quşlar
Sən gələndə
Bir addım atarsan
Deməli sən yaxşı bir insansan
Bir sonrakı səhvinə qədər
Aşağılanmış insan dənəcikləri
Siz birləşib cəmiyyət olmusunuz?
Alçaqdanmış səsimi eşitmirlərmiş
Tamam başqa dildə danışırammış
Mürəkkəb deyilik
tapılmayaq deyə çətinləşirik
Tapılmırıq deyə
hansısa bir kitabın cümlələrindən birində itib – batırıq
Bir musiqinin sözlərində axtarmaq gəlmir ağıllarına bizi
Bəzi şeylər öyrəndim
Məsələn bəzən gülə bilmirsən
Üzündə yapışdırılmış hər an yerə düşəcəkmiş kimi durur
Və iyrənc bir dad buraxır ağzında
O dadla tanış oldum
İnsanların yüksək səsini eşitdim
Və qəbul edilməməyin hissetdirdiklərini
Avara sözünün mənasını öyrəndim
Üzümə nələr dedilər
Şoka düşdüm
Öz doğrularım üçün döyüşdüm
Və doğruların döyüşlərə ehtiyacı olmadığını gördüm
Böyüməyə çalışdım
Və indi yaydır
Filmə üç ay fasilə
Hə bir də insanların dediyinə görə dəli imişəm…