Aprelin 26-da Azərbaycan Dövlət Pedaqoji Universitetində (ADPU) Tədbirlərin təşkili və tələbələrlə iş şöbəsi və 2 nömrəli Uşaq-Gənclər İnkişaf Mərkəzinin təşkilatçılığı ilə mərkəzin Məntiqi riyaziyyat dərnəyinin üzvləri arasında “Yaşıl dünya naminə həmrəylik ili”nə həsr olunmuş “Həmrəy olaq, bir olaq, bu dünyanı qoruyaq” adlı intellektual yarış keçirilib. Yarışın keçirilməsində məqsəd şagirdlərdə yaşıl dünya üçün həmrəylik təfəkkürünün inkişafına dəstək vermək və məktəbli-universitet əlaqələrini inkişaf etdirməkdir.
Universitetdən Mektebgushesi.az-a verilən məlumata görə, yarışdan öncə ADPU-nun sosial və humanitar məsələlər üzrə prorektoru, professor Fikrət Rzayev şagirdlərlə görüşüb, universitet haqqında onlara məlumat verib. Yarışda münsiflər heyəti kimi Riyaziyyat fakültəsinin 4 müəllimi iştirak edib. İntellektual yarışda, ümumilikdə, dərnəyin 44 şagirdi, 7 komanda şəklində yarışıblar. Sonda iştirakçı şagirdlər təşəkkürnamə, I, II və III yerə sahib olan komandaların üzvləri isə diplomla təltif olunub.