Redaksiyamıza Sabunçu rayonu, Pirşağı qəsəbəsi 2-ci Sovxoz ərazisində yerləşən 283 saylı körpələr evi uşaq bağçasının binasının bərbad vəziyyətdə olması ilə bağlı məlumat daxil olub və bildirilib ki, bağçaya təxminən hər gün 20-30 uşaq gedir.Həmçinin qeyd edilib ki, bununla bağlı sakinlər illərdir ki, rəsmi qurumlara müraciət etsələr də, bağça təmir edilmir, valideynlər isə məcburiyyətdən uşaqlarını sözügedən bağçaya qoyurlar. Bununla yanaşı, sakinlərin bildirdiyinə görə, Fövqəladə Hallar Nazirliyinin (FHN) də bağçanın qəzalı vəziyyətdə olması ilə bağlı müvafiq rəyi var. Mövzu ilə bağlıLent.az -a açıqlama verən Bakı Şəhər İcra Hakimiyyəti mətbuat xidmətinin rəhbəri İsrafil Kərimov bildirib ki, həqiqətən də sözügedən bağçanın təmirə ehtiyacı var:

“Bununla əlaqədar bağçanın sökülməsi və yerində yeni, daha böyük bağçanın tikintisi ilə bağlı müvafiq qaydada müraciət olunub. Müraciət proqrama salındıqdan sonra bağça ilə bağlı işlər görüləcək”.