Aprelin 6-da Azərbaycan Dövlət Pedaqoji Universitetinin (ADPU) Ağcabədi filialının İctimai, təbiət fənləri və onların tədrisi texnologiyası kafedrasının təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş “Heydər Əliyev və müstəqil Azərbaycan dövləti” mövzusunda elmi-praktik konfrans keçirildi.
Universitetdən Mektebgushesi.az-a bildirilib ki, konfransın plenar iclasını giriş sözü ilə açan filialın direktoru dosent Mobil Məcidov unudulmaz lider Heydər Əliyevin və torpaqlarımızın ərazi bütövlüyü uğrunda canından keçmiş şəhidlərimizin müqəddəs ruhlarını yad etmək üçün bir dəqiqəlik sükut elan etdi. Dövlət Himni səsləndirildi.
Dos. Mobil Məcidov Azərbaycan xalqının xilaskar oğlu, Ulu Öndər Heydər Əliyevin xalqımızın milli müqəddəratının həlli istiqamətindəki xidmətlərindən danışdı. Qeyd etdi ki, Heydər Əliyev Azərbaycan dövlətçiliyi tarixində elə əzəmətli bir mövqeyə malikdir ki, bizim dünənimiz, bu günümüz və işıqlı sabahımızın hər addımında onun dəsti-xətti var. İllər ötsə, nəsillər dəyişsə belə, parlaq əməllərilə özünü xalqının mənəvi yaddaşına yazan Heydər Əliyev daim yaşayacaqdır.
Konfrans işini filialın İctimai, təbiət fənləri və onların tədrisi texnologiyası kafedrasının müdiri dosent Baxış Ələsgərovun moderatorluğu ilə davam etdirdi.
“Ümummilli Lider Heydər Əliyevin milli-mənəvi dəyərlərimizin inkişafında rolu” mövzusunda məruzə edən kafedranın baş müəllimi, tarix üzrə fəlsəfə doktoru Anar Kərimli dünya şöhrətli siyasətçi, xalqının milli-mənəvi dəyərlərinə bütün ictimai-siyasi fəaliyyəti boyunca sədaqət nümayiş etdirən Heydər Əliyevin bu istiqamətdə apardığı məqsədyönlü siyasətdən danışdı. Qeyd etdi ki, Ulu Öndərin elmi-siyasi irsində vətən, xalq, millət sevgisi, milli adət-ənənələrə qayıdış, mənsub olduğu xalqın mənəvi dəyərlərinə hörmət hissi qabarıq şəkildə özünü göstərir. Məruzəçi onu da vurğuladı ki, Heydər Əliyev irsi milli-mənəvi dəyərləri özündə ehtiva edən milli dərslik olaraq öyrənilməli və gənc nəslə layiqincə çatdırılıb mənimsədilməlidir.
Sonra məruzə ətrafında çıxışlar dinlənildi.
Filialın tərbiyə işləri üzrə direktor müavini dosent Mahir Səlimov, Pedaqogika, psixologiya və onların tədrisi texnologiyası kafedrasının müdiri, p.ü.f.d., baş müəllim Tahir Kərimli, Riyaziyyat, informatika və onların tədrisi texnologiyası kafedrasının müdiri dosent Sahib Zeynalov, Dillər, ədəbiyyat və onların tədrisi texnologiyası kafedrasının müdiri dosent Vaqif Allahverdiyev, Keyfiyyətin təminatı şöbəsinin müdiri, baş müəllim Qərənfil Rzayeva və Pedaqoji fakültənin tyutoru Pərişan Yolçuzadə məruzə ətrafında çıxışlar edərək, Ulu Öndərin ictimai-siyasi fikir tariximizdəki mövqeyi, onun Azərbaycançılıq ideologiyasına əsaslanan məqsədyönlü siyasəti və zamanın Azərbaycan xalqına bəxş etdiyi bu fenomenal siyasi liderin öz işıqlı əməlləri ilə xalqının qəlbində əbədi yaşayacağına inam ifadə etdilər.
Sonda Ulu Öndərin həyatı və ictimai-siyasi fəaliyyətinə həsr olunmuş slayd nümayiş etdirildi.
