İyunun 17-dən ölkə üzrə bəzi lisey və gimnaziyalara qəbul imtahanlarına start verilib.

Bu barədə  Təhsil Nazirliyindən məlumat verilib. Bildirilib ki, imtahanlar iyunun 18, 19 və 20-də davam edəcək.

Qəbul imtahanlarında 20 minə yaxın şagirdin iştirakı gözlənilir.

IV-VIII sinif şagirdləri arasında keçirilən imtahanlar Bakı şəhəri ilə yanaşı, Gəncə, Şirvan və Şəki şəhərləri, Quba, Şəmkir, Oğuz, Biləsuvar, Şamaxı, Ağdaş və Ağstafa rayonlarında da təşkil olunur. İmtahan zamanı şagirdlər Azərbaycan dili və riyaziyyat fənləri ilə yanaşı, məntiqi təfəkkürün yoxlanılması üçün qapalı test tapşırıqlarını cavablandıracaqlar. Yuxarı sinif şagirdlərinə isə əlavə olaraq fizika və kimya fənləri üzrə tapşırıqlar təqdim olunacaq.

Şagirdlər imtahan nəticələrini iyunun 24-dən etibarən qeydiyyatdan keçdikləri şəxsi kabinetləri vasitəsilə öyrənə biləcəklər.

Artıq ikinci ildir ki, lisey və gimnaziyalara qəbul mərkəzləşdirilmiş şəkildə həyata keçirilir. Mərkəzləşdirilmiş qəbul prosesi zamanı şagirdlər imtahan nəticələrinə, yəni toplanılan bala uyğun olaraq, müvafiq lisey və gimnaziya seçimi etmək imkanı əldə edirlər. Yeni mexanizmə əsasən, şagirdlər üç təhsil müəssisəsinə qəbul üçün sorğu göndərə bilər.